Tg zeneize: le anticipazioni delle principali notizie di stasera

Ecco le anticipazione del primo tg settimanale in lingua genovese che andrà in onda questa sera su Primocanale all'interno della trasmissione Liguria Ancheu. E' la sintesi dei fatti più importanti degli ultimi sette giorni con una conduzione che sarà affidata a Fabio Canessa, giovane dell'associazione culturale A Compagna. La prima scaletta pare riguardare soprattutto temi legati a maltempo, trasporti, politica e rifiuti. Non manca la cronaca a metà tra il serio e l'ironico. Appuntamento su Primocanale. 


  Brutto tempo, danni e alagamenti pe tutta l’Italia
A l’é stæta ‘n’atra setemann-a de pascion pe-o brutto tempo, e no solo in Liguria. Schivou o reizego de ‘n’atra aluvion, a Zena l’alerta a l’é stæta retiâ solo che vei. Problemi pe l’ægoa e o vento fòrte: ‘na palaçinn-a con quattro famigge a l’é stæta desbarasâ a-o Lagasso pe ‘na frann-a, atri quaranta scorii d’in caza a Nervi pe ‘na miagia danezâ. A Òrtoneuvo, into spezin, l’é sciortio o Parmigneua. Ægoa a bolacchi e alagamenti a Romma. Carara, in Toscann-a, a l’é finia a bagno pe l’ezondaçion de ‘n sciumme, çentanæa de famigge ancon feua de caza. I mouxi an caxonou di gròsci goasti in scê Rivee, sorviatutto in sce quella de Ponente: Arasce, Vaze e Cogheuo i paixi ciu corpii.

Amt,dipendenti in sciô pê de goæra: venardì sciòpero d’eutto oe
I dipendenti de l’Amt, l’azienda do traspòrto pubrico de Zena, promettan ‘n atro outunno de feugo. Se comensa venardì ch’o vegne co-un sciòpero d’eutto oe da-e 9.30 a 5 oe de dòppodisnâ. I dinæ missi da-o Comun do 2013 no bastan ciu: pe tapâ o beuggio di conti e scansâ o falimento, a direçion a veu desdî tutti i contræti integrativi. I lavoratoî, dòppo a decixon de mantegnî òcupâ a sede de Stagen finn-a frevâ, son intræ de botto inta sala rossa de Tursci. “Vergognæve, o traspòrto pubrico o dev’ese finançiou da-i enti pubrichi, no da chi ghe loua”, a l’é a protesta di scindicati. Pe l’asesoa Dâgnin a corpa a no l’é do Comun, ma da Region ch’a dovieiva stançiâ i fondi. E torna a biscezâ a poia che a çitæ a l’areste a pê comme inti çinque giorni de sciòpero sarvægo de l’anno pasou.

Speize matte, parla o De Lucchi: “Tutti i consegê saivan”
S’alarga ancon l’inchiesta pe-e speize matte in Region. “Firme fase in scî rendiconti? Ou saivan tutti i consegê”. Coscì o pasou tezoê de l’Idv ligure, Zòrzo De Lucchi, indagou lê ascì pe avei contrafæto i papê e instacou di dinæ da-o conto intestou a-o gruppo.

Scarpin: contestâ a Paita, i çitæn dixan “no” pe-a Vorpæa
Emergensa rumenta a Zena, dua contestaçion in Region pe l’asesoa Paita, dòppo che a descarega de Scarpin a l’é stæta serâ perché feua de nòrma. “I zeneixi dovian pagâ un pestasso de Tari pe mandâ a seu rumenta feua da Liguria – mogogna l’opoxiçion – L’é ciæo che a l’Amiu no ghe convegniva fâ cresce l’arecugeita diferençiâ perché a goâgnava co-e descareghe”. Pe de ciu, i abitanti de Stagen an prezentou ricorso a-o Tar pe-o progetto de ‘n neuvo incianto de separaçion secco-umido a-a Vorpæa. I comitati denonçian comme l’aia ateuscegâ, inti anni pasæ, a l’agge fæto ciu mòrti in sciô Bezagno che a Cornigen.

Ladronisso in piseria, aröbæ anche i lavelli
Inta neutte de mâcordì di laddri so-intræ inte ‘na piseria de Casteletto. No sodisfæti d’avei trovou e pigiou l’incascio da giornâ, i mandilæ son intræ in coxinn-a e an aröbou da mangiâ, pe pöi arancâ i lavelli do leugo. A descrovî o ladronisso i dipendenti do locale.